Les mots surlignés font l'objet d'une note
1Monsieur, j’ay receu la votre du XXVe du passé et loue Dyeu de bon cœur que vous et toute
2vostre compaignie soyés en bonne santé. Jay veu la couppie de la votre que vous escrivés au roy, ayant
3très bien notté tout ce qui est comprins dans icelle, principallement pour le regartz de voz estatz
4desquelz je leurs parle à toutes heures, le plus vivement dont je me puis adviser. Cest tousiours une
5mesme responce que pour ladvenyr, ils y pourvoyront et que de ce qui vous est deu du passé, il seroit très
6expédiant destre adverty de quelque chose de bonnes valeurs pour vous rembourcer des arrierages. Il me
7semble vous en avoyr faict mention à mes precedantes lestres de leur accoustumée responce.
8Au demeurant, Monsieur, comme l’occasion fut disposée de faire entendre à leurs magestés la
9[ligne barrée] ne fut avec termes si
10creus comme je mestoys oublyé à le vous escrire quar je vous respons sur mon honneur que leurs
11dites magestés trouvèrent fort bon de la fasson que je leurs parleys comme plus amplement
12je vous satisferay à mezure que jauray ce bien destre près de vous. Quant aux nouvelles de
13ceste court, la paix y est très desirée, principallement de leurs magestés. Daultres désirent le contrepied
14dicelle. Tout y a que lon est extremement marrys de ce qui est arrivé en Flandres, craignant que
15cela nous mette à la guerre. Montz est à demy assiégé. Ceuls dedans font de belles sourtyes. Ilz en
16firent une où le visconte de Guan fut tué, lequel estoit fort estimé du duc d’Albe. Ledit duc prepare
17de belles forces. Elles doyvent saprocher bien toust dudit Montz. Il y a quatre villes en Flandres
18qui nont point vollu encore recevoyr de guarnisons, dont Malignes en est une pour la moindre
19des quatres. je vous remercye très humblement des advys quil vous plaict me donner sur toutes
20les particularités que plus amplement je vous avoys tenu adverty tant pour les dis compaignies
21que le sieur de Cosseins commande, lesquelles leurs magestés avoyent une foys résolus que je les
22iroys commander en Piémont ou sur la frontière là où les urgentes occasions ce présenteroyent
23que pour la levée de gens de piet qu’ilz volloyent que je fisse en Daulphiné et les mener où la nécessité seroit.
24Je ne feray aulcun dessain en cest dit endroit que monsieur d’Evènes ne soit arrivé en
25ceste court, auquel je vous supplie luy dire résoulument vostre entière opinion, laquelle
26je veus soigneusement obsserver pour navoyr rien de si recommandé que voz commandementz. Vous me
27[v°] je ne la vous foys longue quar je suis fort hasté de monter à cheval presentement pour aller
29querir mon seigneur et madame de Lorrayne de la part de leurs dites magestés, lesquelles
30mont commandé de dilligenter le plus quil me sera possible, quar le roy ma commandé dasseurer
31mondit seigneur et dame de Lorrayne que les nopces de Madame et du roy de Nauvarre seront
32le XXIIe du présent. Le dit roy de Navvarre arrivera demain en ceste ville. Mes seigneurs les
33cardinal de Bourbon, de Monpencyé et de Nevers luy allarent au devant dès yert. Monsieur luy yra
34demain au devant. Le mareschal de lougis dudit roy de Navvarre a demandé lougis à la reyne
35mère du roy pour trois mille chevaus. Il cest accompaigné pour venyr en ceste court de toutz ces
36serviteurs. Toutz les princes de ceste court ont mandé leurs serviteurs pour estre accompaignés à ces
37dites nopces. Jay parlé à Monsieur pour les loz de Cabannes. Il ma dit quil men feroit faire la
38despeche. Si je neusse esté envoyé vers mondit seigneur et dame de Lorrayne, je masseure
39que jeusse faict expedyé ce dit affaire incontinant. Je masseure que monsieur de Chastelart
40sollicitera ce dit affaire à mon abssence. Je vous supplie très humblement monsieur, faire part de ceste
41despeche à ma mère et à ma femme quar je n’ay eu le loysir de leur escrire que sera lendroit
42où je salueray voz bonnes grâces par mes très humbles recommandations, priant Notre Seigneur vous
43donner
44Monsieur, en très bonne santé, longue et heureuse vye. A Parys, ce VIIe de juillet.
45Votre très humble et très hobéyssant filz et à jamays
46serviteur.
47Hourches
48Je supplie les bonnes grâces de madame et de messieurs d’Evènes et de Laval, de recevoyr mes très humbles recommandations.
49Mon seigneur de Longueville est en son gouvernement, lequel est avec luy vint et huit compaignies de gendarmes.
50